Умумузул бицен…

ГIалимзабиги рагъухъабиги гурелги гьитIинабго Гьарадирихъ росулъ цебе заманаялда рукIун руго цIакъ лебалал, гугаризе ва цойгидал гьунаразе машгьурал гIадамалги. Гьединал гIадамазде жакъад спортсменал яги альпинисталин абилаан ва амма умумузул биценалда рекъон къоабилеб гIасруялъул тIоцебесеб бащалъиялда Гьарадирихъ (Цебе Хунзахъ гьанже Гумбет районалъул росо) рукIун руго ГIалигъалбацIги Алучги абун кIигоял.

Бицен буго гьел Сагъри абулеб бакIалъан , (МахIачхъала-Болъихъ машинабазул нухда батулеб кьодухъ бакI) бахъун ретIел ботIродаги бухьун, хъатикь кIиго тIилги ккун гIоролъе лъугьунаанила , льарагIльиялде ине хIажат ккараб мехалъ. ГIоролъан къватIире рахъунаанила Гелбахъалде шваралго (Гъизилюрт районалъул росо бугеб бакI) сапар къокъги гьабун.

Гьединго бицен буго цо нухалъ Игьалиб (Гумбет районалъул росо) кIудияб байрам букIанилан. Сверухъ ругел росабалъа гIемерал гьунарчагIи ва махщелчагIи данделъун руго гьенир. Гьенивего вачIун вуго Унсоколоса (Дагъистаналъул райцентрабазул цояб) цIар арав гугарухъан ЦахъахIил абурав чиги. Рахъсидаги ван вачун вачIунев гIадат букIун буго гьесул. Гьесулъе речIизе бокьарав вахъаян амру гьабун буго цадахъ рукIараз. Гьесул кутакаб къуватги речIизе махшелги букIин лъалел гIадамаз шибго жаваб гьабун гьечIо. Гьеб мехаль цадахъ рукIарал росоцояз нахъегIан кьерда чIун вукIарав ГIалигъалбацI цеве цун вуго мун вахъаянги абулаго. Шибго тина-хьина гьабичIого гьес вахъун цевегун ЦахъахIилил габурги ккун, хъат бай абулеб гугарухъабазул хассаб махшалидасан пайдаги босун, гьесда наку гIодоб цвезабун буго. Гьеб бергьенлъилъун рикIкIунебги букIун буго.

Гьелдаса заманго инелде ГIалигъалбацI Шураве (Буйнакск шагьар) ккун вуго цо хIажаталъ. Гьенив базаралда гьасда данд чIван вуго хIанбалиявлъун (грузчиклъун) хIалтIила вукIарав ЦахъахIил. Гьес гьав вихьаравго жинда хадув вилъаян абун буго ГIалигъалбацIида. Хабар калам гьабичIого цеве ЦахъахIилги хаду гьавги шун руго цо ашбазалда (столовая) цере. Жанивги вачун Унсоколосес заказ гьабун буго гьасие микьго “первыйги” микьго “второйги”. АскIор рукIараздаги абун буго гьав Гьарадирихъа ГIалигъалбацI гурони жиндикьа речIун бергьарав чи ккечIин. Гьасдаги абун буго дуца гьаб квен лъугIизегIан кванай абун. ГIалигъалбацIицаги велъун абун буго дир къвачIинуб гьеб лъезе бакI гIоларин цадахъ кваназе рачIаян. Гьедин гьабунги буго. АлхIамдулиллагьги лъун буго квералги рачун ратIалъунги руго.

Автор: Мухамед Аварский

Поделиться в соц. сетях