Исполнитель народных песен Шихабудин  ТIаса Гьарадерихъа Мирзаев Абакарица , Киргизиялда вукIарав Шигьабудин хведал гьабураб кечI.Шигьабудин вукIана тIад магIаруллъиялда цIар рагIарав кочIохъан.Гьес ахIулаан доб заманаялъул машгьурал поэтазул рагIабаздалъун. Жиндиргоги букIана гьесул кочIол мухъал сукIине лъикIабго пагьму.Репресиязул заманаялъ гьев кулак хIисабалда НКВДялъ гочинавула Киргизиялде.
Гасанов Шихабутдин
Проживал: Дагестан, Хунзахский р-н, Арадерих.
Приговорен: 1 сентября 1936 г.
Приговор: Выслан как кулак Реабилитирован 7 сентября 1993 г.
Источник: МВД Республики Дагестан

ГIагараб росу тезе ккедал гьес гьабураб кечI лъолеб буго гъоркьехун,Абакарил кечIалда хадуб.Амма гьеб кечI тIубанго ракIалдасан лъалев чи дихъе швечIо, гьеб кочIолъ цо-цо мухъал камун руго. Бокьилаан гьеб Шигьабудинил кечI лъалев чи ватани, гьал гьикъул ишарабазул бакIалда рукIине кколел рагIаби хъвазе. Гьаб суратги буго ХIасанов Шигьабудинил 1958 соналъ бахъараб .

Гьес жинцаго ахIулеб цо кеч1алъухъ гIенеккизе бегьула гьаниб.02Shihabudin_Araderihi

Дица  хъвалеб  шигIру  магIу  бугилан
Маг1на  бич1ч1инч1еца  ч1валадай  г1айиб
ЧIаго  хут1аразда  хун  вукъарасул
Къисмат  бицунилан  бихьиладай  квеш.

Кагъатгун  къацандун  къаламгун  вагъун
Рагъда  г1умро  анин  г1енкке  цо  дихъ
ГIадада  угьдулеб  керен  дир  Гурин
Киназго  г1ин  т1аме  г1одулеб  рек1ехъ.

Рик1к1адасан  бач1ун  ч1ег1ераб  кагъат
Кибго т1ибит1анин   дур  т1алъиялда
ТIаде  къулилалде  маг1у  чвахулеб
Чанго  раг1и  швана  къадар  кканилан.

Къваридазул  рак1ал  г1ат1ид  гьаризе
ГIумро  кьурав  лачен  чучун  раг1ула
Чалухал  ишазе  шиг1ру  ах1арав
Шигьабудин  жакъад  къаншун  раг1ула.

ГIагарал  божарал  жеги  рихьич1ел
Рихьаралги  хьолбохъ  ч1езе  рук1инч1ев
ЧIалг1ен  бусинег1ан  аск1оре  швеч1ел
Швеч1одай  рак1алде  к1иявго  вацг1ал.

Хвалил  лъар  бегьидал  гьекъеян  абун
Анищан  ккеч1одай  т1аса  иццул  лъим
ТIогьилаб  чу  рек1ун  чанги  сверарал
Сурат  ч1ч1еч1ищ  цебе  росдал  къват1азул.

Къвалицаги  вухьун  мун  унеб  мехалъ
Маг1у  бахъич1одай  Къазахъистаналъ
Хъван  бит1араб  кагъат  кодобе  шведал
Шиб  х1алдай  бук1ана  Будунил  рек1ел.

КIикъоялда  анц1го  соналъ  ц1унараб
Сайгъат  йокьулелъул  лъихъдай  хут1араб
Ялъуни  дур  гьари  къабулги  гьабун
Къаданиб  лъеч1одай  дарайдул  квербац1.

Киве  дун  щваниги  маг1арул  росулъ
Мун  лъаларев  г1адан  г1емер  ватич1о
ГIадамал  руссараб  сух1мат-кепалда
Дур  кеч1  ах1ейилан  абула  хераз.

Херехьдерил  росулъ  маг1и  рукъ  лъуна
Маг1арул  коч1охъан  мун  камунилан
Кула-хьиндадерил  ХIат1охъ  годек1ан
ХIасратаб  маг1о  т1ун  г1одана  мунан.

Муг1рул  регун  нахъа  ЧIик1аб  росулъги
ЧIалг1унаро  бицун  берцинаб  гьаркьил
Гьикъе  божич1они   ТIанусдерида
ТIалъиго  урхъараб    коч1охъанасул.

Пандрий  гьунар  т1ок1ал  т1еренал  килщал
Квасквас  т1упич1ого  т1амур  ккун  рит1е
ТIолго  халкъ  урхъараб  дур  гьаракьалъухъ
Гьанже  г1ин  бай  абе  х1урулг1инзабаз.

Абакар  Мирзаев,
Гьарадерихъ  росу, 1972

Гьарадерихъа Шигьабудинил кечI

Балагье г1адамал г1енекке вацал
Ахир дие швараб давла бихьизе
Дагъистан жибго тун къокъунев къоялъ
Къалам басандараб писму бит1изин

Берал чвахулаго черх бец1ц1улаго
Ц1али ле дир кагъат кодойги босун
Дица росу тедал турарал курмул
Кагътиде ралагьун гьугьумизаре

Дун жанив гьеч1илан ч1ег1ер бан ч1ч1уге
Ч1ух1дае хьвади ле годек1абахъе
Жаниб щунгъар гьеч1еб шай ихтилатан
Угьуге нужеца панаяб х1ухьел

Нахъе вуссунареб сапарги бухьун
Сверанин дицаги г1урус улият
Печатал рух1аги сельсоветазул
Къот1анин дун цеве Фурунзиялде

Адрес нахъе гьеч1еб Хъазахъстаналда
Танин г1одой рехун НКВДялъ
Рач1анщинал къоял къварилъун ина
Къо лъик1 гьабун тарал вацг1алзабазухъ

Къаси макьуялъул бец1аб кьал бугин
Росулъ жибго тараб тайланил т1анч1ихъ
Т1аса эбел араб итарк1оялъе
Лъилдай кумек буго киндай х1ал буго

Рахъунин сапаралъ??????????????
Къвалал щула гьаре баг1ар чуялъул
Чабхъен берцинлъизе бокьун батани
Раче нужецаги панаял бакънал

Параздник баркулел коч1охъабаца
Кинандай к1ут1ила пандрида килищ
Бертин башлагьулел г1олохъабазе
Свери г1ат1ид гьабе ихтилаталъе

Дун т1аде вахунев т1охил раг1алда
Т1огьилаб байрахъ ч1вай ч1ух1дай хьваг1изе
Х1алхьуй дун вук1унев кавуда к1алт1а
Бахъе хъазнил сурат совхозги баркун

Рокьуца гьан чапун чара хварав дун
Чан къо дай бач1ина ч1ег1ер бан ч1арав
Гьаваги бит1араб т1егьги берцинаб
Т1аса мег1ерилан г1еккулин керен

Дуниял урхъараб нухъби х1айранаб
Х1исаб босулаан бух1адил росдал
Сала-каламалде керталги рахан
Баханин дицаги денгиз Алазан

?????????????? къимат лъалесда
Къо лъик1 гьабун танин гьудул гьалмагълъи
Гьардарав бет1ергьан т1ок1аб гьаб х1укму
Лавх1алда къаламалъ хъвандай бук1араб

Дунялалда ругел рух1 лъун щиназде
Щвагиян кьуланин кьалул раг1иги
Кьуч1ч1аб хабарлъидал халалъаниги
Бух1араб рек1еца к1алъан вук1анин

К1алалда печат ч1ван черхалда мах бан
Хут1анин бет1ергьан т1убай дуцаго
Нахъе вусаниги вусинч1ониги
Дунги Шигьабудин Гьарадерихъа

 

Гьаб коч1олъа камурал мухъал лъалев чияс , гьаниб гъоркьехун комментариязда гьел хъвани ц1акъ бокьилаан

Макъала хIадурана МухIамад ГIабдулхIалимовас

Поделиться в соц. сетях