Исана 20-ноябралда нилъер росулъ тIоритIана Расул ХIамзатов гьавуралдаса 90 сон тIубаялда хурхарал тадбирал. Гьел тадбиразулъ аслияб бакI ккуна Расул гьавурав минаялда тарихияб хъвай-хъвагIи гьабураб мармаралъул къоно баялъ. Гьеб рохалилаб данделъиялде ахIун рукIана гIемерал гьалбал,СМИязул вакилзаби ва къватIир ругел росуцоял. Гьеб мероприятиялъул тIубарабго видеоотчёт кватичIого бихьизабизе буго Авар ТВялдасанги. Гьанибин абуни бокьун буго нилъер росуцоял НурмухIамадов МухIамадица ва Муртазалиев ТIалхIатица гьаб росдал байрамалде гьарурал кучIдул ва цо-цо гьенир рахъарал сураталги кьезе.

*********

Огь, гьарадерихъел, гьарадерихъел
Сабруги кIудиял яхIги бергьарал
Гьал кьурабигицин кьватIулеб гIадаб
ГIамал буго нужер жаниб бахчараб.

Дунялалъул шагIир жанив гьавураб
Гьарадерихъ бакьулъ рукъ букIаниги
Гьев нижер вугилан цIар-рец къваригIун
КъватIиве вахъинчIо цохIониги чи.

Расулил рахьдал яц Залмухъ балагье
Дун гьаний йигилан гьаракь рагIичIей
Данде хахарав вац воржунеб мехалъ
Гьев цIуне Аллагьин дугIа гьабурай.

Гьаб къваригIун бугин, доб хIажат бугин
Дагъистанго дуда кIалтIа чIаниги
Хъулухъал кьейилан кумек гьабеян
Гьарадерихъа чи вахъинчIо къватIив.

Гьал руго гIадамал жанирго гIурал
Гьунарги рохелги бахчизе лъалел
Гьоболасе гуреб бетIер къуличIел
Чияр лъадиялда гьимун кIалъачIел

КигIан урхъун холеб ракI бугониги
Инсуца васасул квер бачунарел
РухIгIадин йокьулей эбелалдацин
Ясалъе баизе изну кьоларел.

ХIакимасе бетIер къулун бихьани
Къаялде яс гьарун чи вахунарел
Тохлъукьего туманкI чияда щванани
Жинцаго жиндаго гулла речIчIулел.

Пайзулагьил гьаракь, Шигьал рагIаби
Рахчун тана жанир рец кIваричIилан
Хадижал МухIамад, КIудав Хъазами
ГIелмуялъул иццал къватIире кьечIо

Умумузул гьалбал гьаз хисуларо
Заманги дунялги гебеганиги
Устар ГIободаса, шагIир ЦIадаса
БатIияв чиясе бакI гьечIо гьаниб

Цо патрон гурони кодоб гьечIевги
Рагъде уна гьанив ахIи бачIани
Ункъихъе хъвалхьараб бетIерги къан ккун
Цояб квералъ ханжар хьвагIула гьаниб

ЧIужу гIаданалъул намус цIунизе
Тухум лъугIизегIан рагъула гьанир
Рос хварай чIужуялъ чIегIераб кверлъин
Къаси босадацин бахъичIо гьаниб

КIудиял росабаз гулбуз борлъичIеб
НуцIа хутIун гьечIо некIо заманалъ
Гьал кьурабаздаса кьварарал васаз
ГIасрабаз цIунараб цIумазул улка.

Гьеле гьелъ батила Расулил чорхолъ
Гьаралазул гIадаб гIамал букIараб
Махсароги лъалев, кепги хирияв
Ккаралъуб рагIиги магI гIадин чIвалев

Аллагьас кьуна дуй бикьун шапагIат
Дунялалъул каву кибго рагьизе
Бакъан гьарадерил, кечI цIигьулдерил
Киве ворчIилев мун нижги тун, Расул

Расул, гьарадерил тIолго жамагIат
Мунги ракIалде щун, бакIарун буго
ВачIа квер бачине мугIрул тIогьиве
Умумузул гьалбал данделъун ругин.
Огь, гьарадерихъел, гьарадерихъел
Сабруги кIудиял яхIги бергьарал

Автор МухIамад НурмухIамадов

*********

АсаламгIалайкум лъикI щварал рокъой
КъватIирехун ругел дир росуцоял
РикIкIаде роржунин жан бугел хIанчIи
АхIуларищ кочIолъ – нуж нижер чIухIи
АсаламгIалайкум хириял гьалбал
Гьарула нужое сахлъи ва рохел
ГьитIинаб дир росдал кIудияб байрам
КIодо гьабизелъун гьанире щварал
Дица кучIдул хъвана цIалдохъабазе
ЦIияб сонги баркун сахлъиги гьарун
Дица кучIдул хъвана гIолеб гIелалъе
Ахирияб цIумур кьабулеб къоялъ
Жакъа дица кочIол тема хисана
Тана цIалдохъаби ва гIолохъаби
ГIумрудул сухъмахъаз свераби къотIун
Къан квер ккун вачана цIияб нухдасан
ЦIадаса ХIамзатил “ГIумрудул дарсал”
ГIодовеги виччан цIалана дица
Юсуп МухIамадов хIалай вачIана
ХIинкъи къай лъалев чи кочIохъан гурин
Нилъерго ХIамзатил “Авар рухI” цIалун
ЦIи-цIиял пикраби кодоре щвана
Ингищуса ГIисал “Бисил тIинчI” бачIун”
ЧIунтун букIараб ракI тирхизабуна
..АхIмадибирова дур поэзия
Дица пайдаялъе хIалтIизабуна
Даим къиркъидулел къарнудал нуцIби
Залму Батировалъ рагьана дие
Фазу ГIалива, Залпал пасихIлъи
Гьаб сияхI дагьабги халатаб буго
Хуни гIемерлъулел чIумал киниги
ЧIечIого чвахулеб гIурул лъим гIадин
Пикрабазул чода къокъун унаго
Къункърабазул сасалъ лъалхъизавуна
Балагьана зодов пашманал бераз
Унеб буго боржун свакараб къокъа
Расулил хIакъалъулъ кечI хъвазейилан
ЧанцIулго жендана ботIролъ пикраби
Гьеб гъамас ричIулеб кIул дихъе щвечIо
КIиго лъабго нухалъ хIал бихьаниги
Кинан дун вахинев доб борхалъуде
Расулил творчество тIубан бихьулеб
Кинан дун рещтIинев борхалъудаса
Дир гIумро гIеларо гIодов лъугьине
Живго Расул вачIун цо нухалъ макьилъ
Кьуна дие гIакълу гIодове виччан
КIалагъоркье вегун гIодов кколарин
ГIадада биччаге заманайилан
Векерун унев чи чанги тарулин
Тохго лъоге хIетIе гьаб ракьалда тIад
Дунгоги таранин гIолохъан вукIун
ГIадамасе гъалатI хасиятаб жо
ГIодовцин речIана цо нухалда дун
Цогидазул пикру гIадахъги босун
Напсалъул гурони ургъел гьечIев чи
Гьев мискинчи вугин бицана дие
Месед гIарцул мугIрул нахъе таниги
Толарин хIурдацин гьев чияс лъалкIал
Гьедин накъиталда гIезегIан мехалъ
Гьурщана бицана битIараб тIекъаб
ТуркIун ворчIана дун кватIараб ригьалъ
Кинго бокьун гьечIо макьилъ ватизе
ГIарахъмегIер къотIун накIкIулъан унев
Нухлулавлъун руго ботIролъ пикраби
ХIамил гьир тIад лъураб кIерталъул мисал
КIоларо босизе цебехун гали
Гьединаб хIалалда хIал дагьлъулаго
Цо чанго къо ана къварилъиялда
Къалам кодоб босун хадуб гIодоб лъун
Лъаларо сундалъун гьаб лъугIилебан
Ахир “Вацлъиялъул” хIаракатчагIаз
ХIал кьуна дие гьаб мурад тIубазе
ТIохмугIрул къаданиб кьижараб росу
БорчIизе гьабуна гьезул жигаралъ
Гьадинал дандчIваял такрар гьаризе
Тавпикъ кьейги нужой лебалал васал
ХIамзатил Расулил гьавуралдаса
УнкъоялдаанцIго сонил юбилей
Тарихалда жаниб къокъабго манзил
Къоло цоабилеб гIасрудул авал
Расулил цIар кьураб сон унеб буго
Эб кIодо гьабулеб буго Дагъистан
Нижее гьаб байрам хассаблъун буго
Хвел гьечIев гьев щагIир гьанив гьавидал
Расулил кучIдузги асар гьабула
Гьесул гIумрудул нух гьанисан лъедал
Гьев жанив гьавурав рукъалъул къеда
Хъарщи чIвалеб буго кватIун кканиги
КватIичIого росдал мактабалдаги
Гьесул цIар рагIизе ракIалда буго
Шамилил ракьалде щвараб багIар бакъ
Расулида лъикIан жакъа бихьизе
Москваялда бараб гьесул сиялда
Путин аскIов ана инсухъе гIадин
ГIодоб накуги чIван кодор тIугьдул ккун
Кутакаб адабгун кIалъай гьабуна
Киналдаго нахъа ГIабдулатIипов
ГIодовеги виччан кIалъай гьабулев
Биххараб гьаб низам битIизе бокьун
Кьейги гьесий икъбал я рабби Бечед
КечI лъугьинчIониги дирго пикраби
Киналго нужое дица гьурщана
Гьунар тIокIав щагIир рехсезе бокьун
Бокьанщинаб бицун цеве вахъана
ГIемераб чIикIани гьоцIо кьугIлъула
Кьела гьесий къимат къарнабаз жеги
Къокъаб кечI хъвазейин тIаделъарав дун
ТIаса лъугьа дица чIамучI гьабидал
Баркула баркула дица гьаб байрам
ТIаде рачIаразда росу цоязда
Гьарула гьарула нужое сахлъи
Нижер коллективалъ,дун гьезул вакил.

Автор ТIалхIат Муртазалиев.

Поделиться в соц. сетях